Təşkilatçılar adından Sizi “Xəzər İnşaat Həftəsi 2026” çərçivəsində salamlayıram. 

Bu gün Azərbaycan memarlıq, şəhərsalma və genişmiqyaslı infrastruktur layihələrinin həyata keçirilməsi sahəsində müasir standartları müəyyən edən ölkə kimi mövqeyini inamla möhkəmləndirir. Bakının müasir siması, ölkənin müxtəlif bölgələrində həyata keçirilən genişmiqyaslı quruculuq işləri, eləcə də nüfuzlu beynəlxalq tədbirlərin uğurla keçirilməsi Azərbaycanın peşəkar dialoq, innovasiya və beynəlxalq əməkdaşlıq mərkəzi kimi böyük potensiala malik olduğunu nümayiş etdirir. Azərbaycan Respublikasında 2026-cı ilin “Şəhərsalma və Memarlıq İli” elan edilməsi ölkədə şəhərlərin dayanıqlı inkişafına, müasir tikinti texnologiyalarının tətbiqinə və memarlıq irsinin qorunmasına göstərilən xüsusi diqqəti bir daha təsdiq edir. 

Məhz bu baxımdan “Xəzər İnşaat Həftəsi” xüsusi əhəmiyyət daşıyır. Tədbir tikinti, memarlıq, mühəndislik və infrastruktur sahələrinin aparıcı nümayəndələrini bir araya gətirir. Həftə çərçivəsində 31-ci Azərbaycan Beynəlxalq İnşaat Sərgisi – “BakuBuild”, 6-cı Azərbaycan Beynəlxalq Qarabağın Bərpa, Yenidənqurulma və İnkişafı Sərgisi – “Rebuild Garabagh”, 18-ci Beynəlxalq İstilik, Havalandırma, Kondisionerləşdirmə, Su Təchizatı, Santexnika və Üzgüçülük Hovuzu Sərgisi – “Aquatherm Baku”, 14-cü Xəzər Beynəlxalq Yol İnfrastrukturu və İctimai Nəqliyyat Sərgisi – “Road & Traffic”, həmçinin 5-ci Xəzər Beynəlxalq Plastik və Polimer Sənayesi Sərgisi – “Plastex Caspian” keçirilir. Bu tədbirlər birlikdə müasir texnologiyaların nümayişi, təcrübə mübadiləsi və işgüzar əməkdaşlığın inkişafı üçün vahid beynəlxalq platforma formalaşdırır. 

“Rebuild Garabagh” sərgisi Həftənin proqramında xüsusi yer tutur. Azərbaycan Respublikasının Prezidenti Zati-aliləri cənab İlham Əliyevin “Rebuild Garabagh” sərgisinin iştirakçılarına ünvanladığı salamlama müraciəti tədbirin əhəmiyyətini bir daha vurğulayır və ölkə rəhbərliyinin sərgiyə göstərdiyi yüksək diqqəti əks etdirir. Qarabağ və Şərqi Zəngəzurda yaşayış məntəqələrinin bərpası, müasir infrastrukturun yaradılması, “Ağıllı şəhər” və “Ağıllı kənd” konsepsiyalarının tətbiqi istiqamətində həyata keçirilən genişmiqyaslı layihələr beynəlxalq tərəfdaşlıq, investisiyaların cəlb edilməsi və innovativ həllərin tətbiqi üçün yeni imkanlar yaradır. Sərgi bu nailiyyətlərin təqdim edilməsi və regionun gələcək inkişaf perspektivlərinin müzakirəsi üçün səmərəli platforma rolunu oynayır. 

Bu il “Xəzər İnşaat Həftəsi”ndə 15 ölkədən 250-dən çox şirkət iştirak edir. İştirakçıların 35 faizini yerli şirkətlər təşkil edir ki, bu da Azərbaycanın tikinti sektorunun dinamik inkişafını nümayiş etdirir. Almaniya, İtaliya, Türkiyə və Özbəkistan milli pavilyonlarla təmsil olunur. Həftə ərzində panel müzakirələri və sahə üzrə təqdimatlar keçiriləcək, həmçinin B2B və B2G görüşləri təşkil olunacaq. 

Əminəm ki, “Xəzər İnşaat Həftəsi”ndə iştirak hər bir şirkət üçün öz həllərini təqdim etmək, yeni tərəfdaşlar əldə etmək, peşəkar təcrübə mübadiləsi aparmaq və möhkəm işgüzar əlaqələr qurmaq baxımından yeni imkanlar yaradacaq. 

Fürsətdən istifadə edərək, “Xəzər İnşaat Həftəsi”nə davamlı dəstək göstərən bütün dövlət qurumlarına, assosiasiyalara və sponsorlara səmimi təşəkkürümü bildirirəm. 

Təşəkkür edir, bütün iştirakçılara və qonaqlara uğurlu və məhsuldar “Xəzər İnşaat Həftəsi” arzulayıram. 

Edvard Strachan 
“ICA Events” şirkətinin baş icraçı direktoru