Ağıllı texnologiyalar və iqlim həlləri: MIDEA gələcəyin evlərini bu gündən formalaşdırır
14 oktyabr 2025
0000
ASLAN ƏHMƏDOV
Satış və Marketinq Meneceri, MIDEA Azerbaijan
MIDEA — uzun illərdir ki, yüksək keyfiyyətli iqlim avadanlıqları və ev, eləcə də biznes üçün müxtəlif sistemlər istehsal edən beynəlxalq brenddir. Biz əsasən HVAC avadanlıqlarının — yəni istilik, havalandırma və kondisionerləşdirmə sistemlərinin satışına yönəlmişik. Məhsul portfelimizə həm adi yaşayış yerləri üçün nəzərdə tutulan standart kondisionerlər, həm də kommersiya məqsədli mürəkkəb sənaye sistemləri daxildir.
Eyni zamanda MIDEA “ağıllı ev” texnologiyaları bazarındakı mövqeyini də fəal şəkildə genişləndirir. Bu istiqamət böyük maraq doğurur, çünki müasir istifadəçinin gündəlik həyatında istifadə etdiyi bütün cihazları vahid ekosistemə inteqrasiya etməyə imkan verir. Bu da rahatlıq, təhlükəsizlik və enerji səmərəliliyini təmin edir.
MIDEA artıq üçüncü dəfədir ki, “Aquatherm Baku” sərgisində iştirak edir. Biz bu tədbirləri hər zaman böyük maraqla izləyirik, çünki onlar bizə yeni məhsulları təqdim etmək, müştərilərimiz, tərəfdaşlarımız və potensial alıcılarımızla birbaşa ünsiyyət qurmaq imkanı yaradır. Hər bir sərgi bazarın tələblərini, gələcək inkişaf istiqamətlərini daha yaxşı anlamaq və istifadəçilərdən dəyərli rəy toplamaq üçün əvəzsiz fürsətdir.
Şirkətimizin məhsulları geniş həll çeşidini əhatə edir. Kommersiya seqmenti üçün biz VRF sistemləri, çillerlər, istilik nasosları, fan coil sistemləri və digər kompleks qurğular təklif edirik. Bu sistemlər iri binalarda sabit və komfortlu iqlimi təmin etməyə imkan verir. Ev istifadəsi üçün isə daha sadə, lakin effektiv həllər təqdim edirik: invertor tipli kondisionerlər, standart on-off sistemlər və premium seqment modellər. Maksimum çeviklik axtaran müştərilər üçün multi-split sistemlər təklif edirik — bir xarici blok vasitəsilə beş daxili bloku idarə etmək mümkündür ki, bu da çoxmərtəbəli binalar və bir neçə otaqlı obyektlər üçün ideal həlldir. Hazırda müştərilərimizə MIDEA su qızdırıcıları da təqdim edirik — bu məhsullar yüksək keyfiyyət, enerji səmərəliliyi və uzunmüddətli istismar dövrü ilə seçilir.
Gələcək üçün ən perspektivli istiqamətlərdən biri də işıqlandırma sistemləridir. Biz müasir “lighting” həllərinin tətbiqi üzərində işləyirik və bu texnologiyalar “ağıllı ev” sistemlərinə inteqrasiya edilə bilər. Enerji səmərəliliyi, ekoloji təmizlik və avtomatlaşdırma sahəsindəki yenilikləri yaxından izləyir, müştərilərimizə yalnız aktual və effektiv həllər təqdim etməyə çalışırıq. Məqsədimiz hər bir müştəriyə — fərdi istifadəçidən tutmuş iri şirkətə qədər — tam xidmət paketi təqdim etməkdir: avadanlıq seçimi üzrə konsultasiyadan başlayaraq quraşdırma, sazlama və sonrakı texniki xidmətə qədər. Bu yanaşma bizə müştəri və tərəfdaşlarla uzunmüddətli əlaqələr qurmağa və MIDEA brendinin Azərbaycandakı mövqeyini daha da gücləndirməyə imkan verir.
Sərgi ilə bağlı təəssüratlarım çox müsbətdir. Məkan çox rahat təşkil olunub, burada məhsulları real şəraitdə nümayiş etdirmək, onların funksiyalarını və üstünlüklərini canlı şəkildə göstərmək mümkündür. Ziyarətçilərlə birbaşa ünsiyyət qurmaq çox dəyərlidir, çünki canlı dialoq heç bir onlayn təqdimat və ya kataloqun əvəzini vermir. Biz ziyarətçilərin suallarını cavablandıra, avadanlığın iş prinsiplərini izah edə və müxtəlif istifadə ssenarilərində onun necə inteqrasiya olunduğunu göstərə bilirik. Ziyarətçilərin və sektor üzrə həmkarların marağını görmək bizi çox sevindirir. Bir çoxları məhsul çeşidimizin genişliyini, avadanlığın keyfiyyətini və MIDEA şirkətinin innovativ yanaşmalarını xüsusi vurğulayır.
Bu maraq bizi daha da inkişaf etməyə, yeni texnologiyaları tətbiq etməyə və Azərbaycan bazarı üçün daha maraqlı və müasir həllər təklif etməyə ruhlandırır. Nəticə olaraq qeyd etmək istərdim ki, MIDEA Azərbaycanda HVAC və “ağıllı sistemlər” bazarında lider olmağa çalışır. Biz əminik ki, hər il məhsullarımıza olan tələbat artacaq, müştərilərimiz və tərəfdaşlarımızla əməkdaşlıq isə daha səmərəli olacaq.
AZ
EN
RU
ZH
